మా విఘ్నేశ్వరుడు

వినాయకచవితి అంటేనే హడావుడి.దేవుణ్ణి,పత్రిని,పూలు,పళ్ళు అన్నీ తెచ్చుకోడం,పిండివంటలు చేయడం,పూజకు అమర్చుకోడం,ఆ ఒక్కరోజూ మాత్రం ఊపిరాడదు.చిన్నప్పుడు నాన్నగారు శుక్లాంభరధరం అని చదువుతూ పాలవెల్లి కట్టి దేవుణ్ణి పెడుతుంటే చిన్నిచిన్ని కాయలన్నీ దారాలుకట్టి అందించడం ఓ గొప్ప సరదా.

బుజ్జిబుజ్జి సీతాఫలం,జామకాయలు,ద్రాక్షగుత్తి అన్నీ వేలాడుతుంటే ముచ్చట పడిపోయి తప్పనిసరిగా వైరు హోల్డరూ పెట్టించి దానికి ఆకుపచ్చ బల్బ్ పెడితే చిన్న పందిరిలా భలే ఉండేది.

చిన్నప్పుడున్నంత సరదా ఇప్పుడు లేకపోయినా సాధ్యమైనంత వరకు ఓపికగా అలంకరించి పూజ చేసుకుని,అంతా అయ్యాక చూసుకుంటే వెలిగే దీపాల మధ్య వినాయకుడు దీవిస్తూ మెరిసిపోతుంటాడు ఉదయం నుండీ పడ్డ శ్రమంతా మర్చిపోతాము,తెలియని తృప్తి మనసంతా నిండుతుంది.

మా ఫ్లాట్స్ లో కూడా గణపతి విగ్రహం పెట్టి బాగా చేస్తారు,ఈ సారి ఎకోఫ్రెండ్ లీ అని ఎంత ట్రై చేసినా మట్టితో చేసింది దొరకలేదు,అందుకని పైన ఫోటోలోని విగ్రహమే తేవలసివచ్చింది.రోజూ సాయంత్రాలు పూజలు,ప్రసాదాలు,శుక్రవారం లక్ష్మీపూజ ఆఖరిరోజున అందరికీ భోజనాలు,తరువాత నిమజ్జనం అదీ కార్యక్రమం,ఏడాదికోసారి గణపయ్య పుణ్యమా అని సందడి.